वैद्यकीय व्यवसाय --- एक सुळावरची पोळी

पाय दुखत होता म्हणून काल नेहमीच्या डॉक्टरांकडे गेलो होतो. बाहेर वेटींगला कोणी नसल्यामुळे डॉक्टरपण गप्पा मारत बसले. तेव्हढ्यात रिसेप्शनची मुलगी चिठ्ठी घेऊन आत डोकावली.. "सर, ह्या पेशंटला शॉक लागलाय म्हणून आणलंय"... डॉक्टरनी त्वरेने सांगितले की त्याना हॉस्पिटलमधे जायला सांग कारण आपण इथे काहीच करु शकणार नाही. त्याना हेही सांग की शॉक लागल्यामुळे अचानक पणे डिहायड्रेशन होऊ शकते, म्हणून तिकडॆच जा. दोनच मिनीटात धाडकन दरवाजा उघडून दोघेजण आत आले. "सर, फार काही नाही, फक्त चेकअप करा" डॉक्टरनी समजावूनही त्यांचे म्हणणे होते की सर फार काही नाहीये, तुम्ही फक्त चेक अप करा.
लोकं असं का करतात हे कळत नाही.... डॉक्टरनी सांगूनही त्यानीच चेकअप करावे हा का आग्रह? बरं, पेशंट संपूर्ण अनोळखी म्हणजे याच डॉक्टरवर विश्वास वगैरे म्हणून आग्रह नव्हे... "सर, फार काही नाही, फक्त चेकअप करा" म्हणजे काय करायचे हे पण पेशंटनेच ठरवायचे म्हणजे गंमतच... अरे, तुम्हालाच सगळं कळत असेल तर मग येता कशाला डॉक्टरकडॆ?
बसल्याबसल्या मला फेबूवर एका सुशिक्षित मातापित्यानी केलेला आक्रोश आठवला... मुलाला खोक पडल्याने रक्तबंबाळ अवस्थेत त्याला जवळच्या एका सर्दी,ताप, खोकला यांचे रुग्ण तपासणा-या आणि वयाने नव्वदीत पोचलेल्या डॉक्टरकडॆ नेले. मोठी जखम असल्याने टाके घालणॆ हे काही त्यांच्या इथे शक्य नाही म्हणून त्यानी जवळच्या हॉस्पिटलला न्यायला सांगितले... गंमत म्हणजे वाटेत लागणारे हॉस्पिटल टाळून त्याच रस्त्यावरुन ही मंडळी पुढे एका तशाच डॉक्टरकडे धडकली. पेशंट पाहण्यापूर्वीच त्याही डॉक्टरनी सेम निरोप बाहेर पाठवला.... बस्स, आईवडीलांचे पित्त खवळले... डॉक्टर देवदूत नसून पैसे कमावणारा सैतान ठरला.
अरे, इतक्या गंभीर परिस्थितीत भान राखून मोठ्या हॉस्पिटलमधे न नेता इतरत्र फिरण्यात ज्यानी वेळ घालवला ते दोषी नाहीत पण डॉक्टरनी साधे बाहेर येऊन पाहिले पण नाही म्हणून त्यांच्याविरुद्ध गळा काढून हे मोकळे... सुदैवाने मुलाची जखम प्राणघातक नव्हती अन्यथा डॉक्टरविरुद्ध 302 कलम लावण्याची पण फेबूवर त्यानी मागणी केली असती.... असो
आजकाल वैद्यकीय व्यवसाय पण सोपा नाही राहीलेला... कायद्याचा आपल्याला नसेल इतका जाच या व्यवसायाला आहे. पूर्वी जनरल प्रॅक्टीशनर बाळंतपणा पासून किरकोळ ऑपरेशन पर्यंत सारं काही करत.... अपयश आलं तरी लोकांची डॉक्टरवर इतकी श्रद्धा असायची की नातलग पण म्हणायचे की त्याची आयुष्यरेषाच तेवढी होती त्याला तुम्ही तरी काय करणार डॉक्टर? पण आता, लगेच धमक्या, पेपरबाजी, पुढा-यांचा दम आणि कायदेशीर कारवाई सुरु होते आणि हे करण्यास नातलगच पुढे येतात. उपचार न करावेत तर पैसे उकळणारे सैतान आणि माणूसकीसाठी जरा धोका पत्करावा तर कायद्याचा जाच सुरु होतो की तुम्ही सर्जन नाहीत तर हे का केलेत? स्त्रीरोगतद्न्य नाहीत तर बाळंतपण का केलेत? ... त्यामुळे अनेकदा पेशंट योग्य उपचार मिळतील तिथे पुढे पाठवण्याचा मार्ग चोखाळला जातो.
कालच्या निमित्ताने हे सगळं नजरेसमोर आलं इतकंच......